Pinduoduodan qanday buyurtma beriladi: O‘zbekistondan to‘liq qo‘llanma

Pinduoduo O‘zbekistonda ishlaydimi?

Ha. Pinduoduo (拼多多) — Xitoyning eng yirik onlayn bozorlaridan biri, uning ilovasi O‘zbekistondan ham ochiladi: ro‘yxatdan o‘tish, qidirish va to‘lash ishlaydi. Ishlamaydigan yagona narsa — O‘zbekistonga to‘g‘ridan-to‘g‘ri yetkazish. Pinduoduo sotuvchilari yukni faqat Xitoy ichidagi manzilga jo‘natadi, shuning uchun manzilga kargoning Xitoy omborini yozasiz.

Taobao’ni ham ko‘rib chiqmoqchi bo‘lsangiz, u uchun alohida qo‘llanma bor — manzil va kargo qismi ikkalasida bir xil.

Boshlashdan oldin: sizga nima kerak

• Pinduoduo ilovasi (拼多多) — qanday o‘rnatish quyida.
• Visa yoki Mastercard karta, chet el internet to‘lovlariga ochiq. Buni odatda bank ilovasida yoqish mumkin.
• DTD ID va Xitoy ombor manzili — ikkalasi ham Telegram botimizda beriladi. Ro‘yxatdan o‘tish bir necha daqiqa oladi, ID darhol chiqadi.

1-qadam. Ilovani o‘rnating

• iPhone — App Store’da «拼多多» yoki «Pinduoduo» deb qidiring.
• Android — Pinduoduo 2023-yil martdan beri Google Play’da yo‘q. Ilovani faqat rasmiy saytdan yuklang: telefon brauzerida pinduoduo.com ni oching va yuklab olish tugmasini bosing.

2-qadam. +998 raqam bilan ro‘yxatdan o‘ting

1. 1

   Telefon raqam bilan kirishni tanlang

   Ilovani ochib, pastdagi «个人中心» (shaxsiy bo‘lim) ni bosing va «手机号登录» (telefon raqam bilan kirish) ni tanlang.

2. 2

   Mamlakat kodini almashtiring

   Raqam oldidagi «+86» ni bosing va ro‘yxatdan O‘zbekistonni (+998) tanlang. Keyin raqamingizni kodsiz kiriting.

3. 3

   SMS kodni kiriting

   6 xonali kod SMS orqali keladi. Alohida parol shart emas — keyingi safar ham SMS kod bilan kirasiz. WeChat hisobingiz bo‘lsa, u orqali ham kirish mumkin.

3-qadam. Xitoy ombor manzilini kiriting

Bu — eng muhim qadam. Manzilda bitta belgi xato bo‘lsa ham yuk omborimizga yetib keladi, lekin kimniki ekanini aniqlab bo‘lmaydi. Manzilni botdan olasiz va Pinduoduoga bir marta saqlab qo‘yasiz. Uni «个人中心» → «收货地址» (yetkazish manzillari) bo‘limida yoki birinchi buyurtma sahifasida qo‘shish mumkin.

1. 1

   Qabul qiluvchi va telefon

   Botdagi manzilning «name» qatorini «收货人» (qabul qiluvchi) maydoniga, «phone number» qatorini «手机号码» (telefon) maydoniga aynan nusxalang.

2. 2

   Hudud

   «所在地区» (hudud) maydonida manzil boshidagi viloyat, shahar va tumanni ketma-ket tanlang. Hududni tanlamay qoldirish — eng ko‘p uchraydigan xatolardan biri.

3. 3

   To‘liq manzil

   «详细地址» (to‘liq manzil) maydoniga botdagi manzil qatorini oxiridagi ID bilan birga nusxalang.

4. 4

   Standart manzil qilib saqlang

   «设为默认地址» (standart manzil) belgisini yoqing — keyingi buyurtmalarda manzil o‘zi tanlanadi.

4-qadam. Mahsulotni toping va tekshiring

Qidiruvga xitoycha yozsangiz natija ancha ko‘p chiqadi. So‘zni tarjimonda xitoychaga o‘giring yoki jadvaldan oling:

• Rasm bilan qidirish — qidiruv qatoridagi kamera belgisini bosing va rasm yuklang. Instagram’da ko‘rgan narsangizni shunday topish oson.
• Sotuv soni — mahsulot sahifasida «已拼 … 件» (… dona sotilgan) deb yoziladi. Ko‘p sotilgan mahsulot odatda sinovdan o‘tgan bo‘ladi.
• Rasmli sharhlar — «评价» (sharhlar) bo‘limida xaridorlar olgan mahsulotning haqiqiy rasmini ko‘ring.
• O‘lcham — xitoy o‘lchamlari odatda bir-ikki o‘lcham kichik. O‘lchamlar jadvaliga («尺码») qarang yoki sotuvchiga bo‘yingiz va vazningizni yozing.
• Brend mahsulot — «百亿补贴» (subsidiyali brend mahsulotlar) bo‘limi yoki rasmiy do‘kon («旗舰店») ni tanlang. Brend nomi bilan g‘ayrioddiy arzon narx — ko‘pincha nusxa. Brend yuk uchun kargo tarifi alohida — tariflar.

Sotuvchiga savol bermoqchi bo‘lsangiz (o‘lcham, rang, jo‘natish muddati), tayyor xitoycha jumlalar alohida maqolada.

5-qadam. Yakka xarid yoki «拼单» — guruh xaridi

Pinduoduoning asosiy farqi shu: mahsulot sahifasining pastida ikkita tugma bo‘ladi va ularda ikki xil narx turadi.

• Mahsulot sahifasida ko‘pincha «… 人在拼单，可直接参与» (… kishi guruh ochgan, qo‘shilsa bo‘ladi) degan qator chiqadi — yonidagi «去拼单» ni bossangiz, arzon narxda darhol xarid qilasiz.
• O‘zingiz guruh ochsangiz, buyurtma «待分享» (guruh kutilmoqda) holatida turadi. Guruh 24 soat ichida yig‘ilmasa, pul avtomatik qaytariladi.
• Shoshilinch bo‘lsa — tayyor guruhga qo‘shiling yoki yakka xarid qiling.

6-qadam. To‘lang

To‘lash sahifasiga («确认订单») o‘tganingizda eng tepadagi manzilga qarang — u DTD manzili va ichida sizning ID ingiz bo‘lishi kerak. Keyin to‘lov usulini tanlang va to‘lang.

Karta o‘tmayaptimi? Avval bank ilovasida kartaning chet el internet to‘lovlariga ochiqligini tekshiring. Baribir chiqmasa — operatorimizga yozing, yo‘l ko‘rsatamiz.

7-qadam. Trek raqamni toping va yukni kuzating

Buyurtma holatlari: «待发货» — sotuvchi hali jo‘natmagan, «待收货» — jo‘natildi. Jo‘natilgan buyurtmani oching → «查看物流» (logistikani ko‘rish) — u yerdagi «快递单号» yoki «运单号» sizning trek raqamingiz.

Trek raqamni botga kiritish shart emas: ID manzilda to‘g‘ri yozilgan bo‘lsa, yuk omborimizga kelishi bilan o‘zi sizning hisobingizga tushadi va bot xabar beradi. Istalgan paytda trek.d2d.uz da ro‘yxatdan o‘tmasdan ham tekshirishingiz mumkin.

Pinduoduoda bir buyurtmaga ko‘pincha har xil do‘konlardan mayda narsalar olinadi — har bir do‘kon o‘z posilkasini alohida jo‘natadi va har birining o‘z trek raqami bo‘ladi. Xavotir olmang: bir reysga tushgan hamma posilkangiz bitta hisobga qo‘shiladi.

Kargo qancha turadi va necha kunda keladi

Muddat yuk Xitoy omborimizga yetgan kundan hisoblanadi. Kargo haqi mahsulot narxiga emas, og‘irligiga qarab olinadi: og‘irlik × tarif. 1 kg dan yengil yuk haqiqiy og‘irligi bo‘yicha hisoblanadi.

Mahsulot narxi, Pinduoduo komissiyasi va kargoni birga hisoblash uchun tannarx kalkulyatori bor. Katta, lekin yengil buyum (o‘yinchoq, stul, plastmassa idish) hajmiga qarab hisoblanadi — o‘lchamlarini oldindan operatorga yuborsangiz, narxni aytib beramiz. Avia yukning har kilogrammi uchun DUR keshbek yig‘iladi: 20 DUR = 1 kg bepul yetkazish — DUR dasturi.

Nimalarni olib bo‘lmaydi

• Faqat avto bilan: atir va boshqa suyuqliklar, powerbank va batareyasi katta qismini egallaydigan buyumlar — ular uchun faqat avto manzilni ishlating.
• Umuman olib kelinmaydi: telefon, kompyuter, planshet, dori, vitamin va BAD, oziq-ovqat, kukun shaklidagi moddalar, dron va uning qismlari.

To‘liq ro‘yxat — bojxona sahifasida. Ishonchingiz komil bo‘lmasa, xarid qilishdan oldin operatordan so‘rang.

Bekor qilish va qaytarish

Buyurtmani bekor qilish va pulni qaytarish Pinduoduo ilovasida, sotuvchi bilan hal qilinadi — buni yuk Xitoy omborimizga yetib kelmasdan qilgan ma’qul. Sotuvchi hali jo‘natmagan bo‘lsa, buyurtmani ilovaning o‘zida bekor qilish mumkin. Yuk omborga kelib bo‘lgan, lekin buzuq yoki boshqa mahsulot kelgan bo‘lsa — trek raqam, DTD ID va mahsulot rasmini operatorga yuboring, ko‘rib chiqamiz.

Pinduoduo xaridorlarining 6 ta xatosi

1. 1Ilovani notanish saytdan yuklash — faqat pinduoduo.com yoki App Store.
2. 2Manzilga ID yozmaslik yoki faqat bitta qatorga yozish — yuk omborda «egasiz» qoladi.
3. 3Guruh ochib, yig‘ilishini kutmaslik — buyurtma «待分享» da qolib, 24 soatdan keyin bekor bo‘ladi. Tayyor guruhga qo‘shiling yoki yakka xarid qiling.
4. 4Avto yuk uchun «(By land)» ni o‘chirib yuborish — yuk avia bilan jo‘natilishi mumkin.
5. 5Taqiqlangan mahsulot olish — telefon, dori, vitamin bojxonada to‘xtatiladi. Ro‘yxatni tekshiring.
6. 6Sotuvchi hali jo‘natmagan yukni kargodan so‘rash — avval Pinduoduoda holat «待收货» ekanini tekshiring.